Á Varmalandi var í orðsins fyllstu merkingu horft til himins þann 16.febrúar í stjörnuveri Snævarrs. „Horft til himins „ var verkefni náttúrufræðihóps í þróunarverkefninu Borgarfjarðarbrúin.
Allir nemendur skólans, að undanskildum 4.-5.bekk sem fór til Reykjavíkur á leiksýningu, fengu fræðslu um himinhvolfið, sól, tungl og stjörnur. Fangaði viðfangsefnið bæði nemendur og kennara þar sem Snævarri tókst einkar vel að gera verkefnið áhugavert.
Elstu nemendum leikskólans var boðið að taka þátt með 1.bekkingum og komu þeir ásamt kennurum sínum og fylgdust með af athygli.
Það er gaman að geta brotið upp venjubundið skólastarf með þessum hætti og fundið það virka m.a. sem áhugahvöt til að fræðast enn frekar.
Það kæmi ekki á óvart að yngstu nemendur skólans ættu eftir að leita hjálpar foreldra sinna í leit að stjörnumerkjum á himninum þegar myrkrið færist yfir og stjörnurnar skína.